WILLEMINA `08 HÔNGERD JAOR JÔNK!!!!!

1.
Dao es `ne tiêd gewaesj, det de Wilhelmina supporters de sport-gezét oppe maondjig oppe kop moste haoje as me di-j mét `ne glimlach woej laeze. Woeërum? Dan stong me teminste boeëvenaan!!
Noow gieët `t met eige voetballers- en `n paar van rontelum Wieërt- neet slecht. En……. Ze bestaon in 2008 100 jaor!!!!!
Fieëst dus. En um te fieëste mojje cente hebbe en um cente te hebbe mojje wat organisieëre! “Wej-jae neet wat Frênkse?” vroog mich `ne voetballer dae vreuger mét `n hieël groeëte voetbalbôks spuuëldje en zoeë good kost voetballe det zelfs eredivisie-clubs (vurâl MVV) hem gaer woeje hebbe. (Ich zal gein name neûme, mer dae kost scheete det `t “Knep-perdje”). Hae woor- en és- `ne echte Wilhelmina-mân en kost niks verkieërdjs oeëver de club huuëre. Mer…..`t woor `n echte aojjoor, lachdje gaer en dreidje as `t kost eederein op!
Mét de gedachte: “Zoeë noow es hae us aan de buuërt, begos ich.” “Gae motj `n loeëtereej haoje. De hoeëfdprieës es `n paerd! Gae verkouptj 3000 loeëte aan € 2,= en gae vraogtj hieël netjes aan Gordijn: “Menieër Gordijn wildje mich asjebleef geen paerd gaeve vör de loeëtereej van Wilhelmina? Dae mentj dejje gek zeetj en rupt waarschieënlik: “Ich gluf dejje gek zeetj! Di-j koste wul `n miljoen!”
“Mer hae hieët zoeëvul paerd, dette misschien `n kapot paerd hieët ligke en det krieje gegarandieërdj mét. Hae es blî-j dette d`r vanaaf es!” zag ich. “Jaooooomèr, good en waal,”zag de vreugere blouw-witte kampioen scheif (de boel neet vertrouwendj) umhoeëg kiekendj: “As dae mins dae det kapot paerd hieët gewonne zieët dette det neet wiltj; waat dan?” “Nouw, dan gaefdje hem zien cente trök!!!” woor `t antwoeërd.
Mét: “Börsj aszje Wiltj!” kost ich `t doon en hae leep nao `t buffet!

WILLEMINA `08 HÔNGERD JAOR JÔNK!!!

2.
De hoeëfdpersoeën oet `t vuuërige verhaol steurdje eine oet `t bestuur op mich aaf mét de boeëdschap det ich `n good idee haaj um gêldj bi-jein te kriêge vör te fiêste in het kader van `t 100 jaorig bestaon van Wilhelmina `08.
Ich neûm weer gein naame, mer `t es `n “gewichtig” persoeën, dae scheidsrechter es gewaesj en `n medalie van de kuuëninging opgespeldj hieët gekrieëge. Hae wetj alles aaf van de Post en de Kruisstraot en es fanatiek Wilhelminamân. Dae kleine opnei-jer aan `t buffet hieël alles mét `ne groeëte greins inne gaate!
“Ich huuërdje dejje `n good idee haadj um cente beej-ein te kriêge.”zagge. “Nou nein, neet ich mer dae dao aan `t buffet!” wînkdje ich stil met mienekop in de richting van de vreugere kampioen. “Mer dae zag, det ich det allemaol baeter zôw kunne vertelle!” “`t Zal mich wat zeen!” zagge `n bitje ongeluuëvig de vreugere middevuuër kinnendje.
“Maakdj `n dvd van de hoeëgtepunte in 100 jaor van Wilhelmina `08, zagge” loeëg ich, ôngertösse det ich `n hieël ânger verhaol begost. “En dan?” vroeëg `t bestuuërslid,
wantrouwendj nao `t buffet umkiekendj. “Hae haaj d`r al ein op proof gemaaktj en verkochtj vör € 7,50!”woor `t ântwoeërd. “En waat zag de klânt?”woor de nôwschierige vraog.
“Hae woor beej hem, dao aan `t buffet, trök gekaome.” zagge. Dae mîns haaj giftig geroope: ” Dao stieët op de dvd “Hoogtepunten van Wilhelmina `08 in 100 jaar” niks op!” “En wejje waat `t antwoeërd woor?” loeëg me wieter “En `t es uut zieëne moond bekans neet te gluîve!
DET KLOPTJ!!” De besteûrder woeërd roeëd tot in ziêne kraag dreidje zich in de richting van de greinzendje Wilhelmina-mân- dae `t verhaol van `t paerd haaj verwachtj en lôl haaj det ouch `t bestuurslid woor gekloeëtj en reep: “Börsj aszje wiltj!” en leep mét driftige passe wèg.
Aan `t buffet zoot d`r eine met `n gefronsj vuuërhoofd- dein dânger neet snappendj- de bestuuërder nao te kieke………..Ich ging d`r eine drînke!

Frans Adriaens